هي البنت لما راحت لأبوها وقالتله إن سيدنا موسى قوي وأمين عرفت منين إنه أمين؟!

[ابو ساره]

هي البنت لما راحت لأبوها وقالتله إن سيدنا موسى قوي وأمين عرفت منين إنه أمين؟!
=عشان سقالهم الغنم بتاعهم.
-وهي فين الأمانة في الموقف ده!!
=هو في سبب تاني؟!
-اه.
لما سيدنا موسى عليه السلام وصل مدين، راح بالأخص عند البئر وقعد هناك، الطبيعي لما بتكون داخل لوحدك مكان جديد عليك بتفضل تبص على المكان يمين شمال وتشوف تصرفات الناس وطريقة كلامهم وعاداتهم وهكذا، وده اللي حصل مع سيدنا موسى؛ لما شاف مجموعة كبيرة من الناس بتتزاحم عند البير عشان يسقوا مواشيهم وأغنامهم ولاحظ إن في بنتين واقفين لوحدهم على جنب وبيمنعوا مواشيهم وأغنامهم إنهم يروحوا للبير، فسيدنا موسى لما شاف المنظر استغرب وقرر بشهامة يروح يسألهم عن السبب!
فالبنتين ردوا وقالوا:" لَا نَسْقِي حَتَّىٰ يُصْدِرَ الرِّعَاءُ ۖ وَأَبُونَا شَيْخٌ كَبِيرٌ"
هما اتعودوا كل مرة يستنوا لما الناس دي كلها تخلص سقي أغنامهم ومواشيهم وبعد كده يروحوا يسقوا أغنامهم من المية اللي فاضلة منهم في الحوض لإن ماينفعش يزاحموا الرجال، والوحيد اللي كان ينفع يعمل كده هو أبوهم وهو للأسف راجل كبير في السن فمايقدرش!
فسيدنا موسى قرر يساعدهم فأخد مواشيهم وأغنامهم وراح سقاهم بنفسه ورجعهملهم تاني وراح قعد في الظل.
فالبنتين لما رجعوا لأبوهم حكوله عن موقف الشاب الشهم معاهم، فأبوهم طلب من بنت منهم إنها تروح للشاب ده تطلب منه يجي يقابله عشان يشكره بنفسه على شهامته مع بناته.
وفعلًا البنت راحت لسيدنا موسى وسيدنا موسي وافق يروح معاها لأبوها.
وهما ماشين في الطريق، هي كانت ماشية قدام، وسيدنا موسى كان ماشي ورا وده لإنها هي اللي عارفة الطريق، وفي اليوم ده كان في رياح شديدة، والرياح مهما كان اللبس واسع لما بتخبط في الملابس بتصف شكل وحجم الجسم!، وده اللي حصل مع البنت، فلما ده حصل، سيدنا موسى وقفها وقالها إنه هيمشي قدامها وأمرها تمشي وراه، ولو على معرفة الطريق، سهلة، تمسك شوية حصى في ايديها، لو مفروض الطريق يمين ترمي حصوة ناحية اليمين وهو هيفهم، ولو يمشي شمال ترمي الحصوة ناحية الشمال وهكذا.
-هو ده الموقف اللي اتأكدت فيه من أمانته؟
=بالظبط.
-طب والقوة؟ عرفت منين إنه قوي؟ طالما موقف السقاية شهامة ومروءة؟!
=لما سيدنا موسى راح يسقيلهم الغنم كان محطوط فوق البير حجر ضخم، والحجر ده معروف بين أهل مدين إنه عشان يتشال محتاج عشر رجال يشيلوه قصاد بعض، وهو وقتها شاله لوحده!
-😲
وعشان كده لما رجعت لأبوها قالتله:" يَا أَبَتِ اسْتَأْجِرْهُ ۖ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ"
#القوي_الأمين💙
والله أعلم
#تفسير_آيات_القرآن
علمنا الله وإياكم